Cfarë parashikon ligji në Shqipëri për lejen prindërore

Kodi i Punës , neni 132/1  ka parashikuar të drejtat për leje prindërore .

Sipas këtij parashikimi ligjor prindërit kanë të drejtë të përfitojnë  leje prindërore të papaguar për një  përiudhë prej jo më pak se 4 muaj, derisa fëmija që kanë ngarkim të arrijë moshën 6 vjeç. E drejta për të kërkuar lejen prindërore është individuale për secilin prind dhe nuk është e transferueshme, me përjashtim të rasteve kur njëri prind vdes. 

Leja mund të jepet e ndarë, por jo më pak se një javë në vit. Kohëzgjatja përcaktohet me marrëveshje me shkrim midis punëdhënësit dhe punëmarrësit. Në rastin e birësimit të fëmijës, leja prindërore jepet brenda 6 vjetëve, që nga dita e birësimit të fëmijës, por jo më vonë se kur fëmija mbush moshën 12 vjeç. 

Sipas Ligjit per Sigurimet Shoqërore, neni 27 pika 7 e tij, të drejtën per të përfituar lejen e lindjes pas periudhës 63 ditore pas lindjes së fëmijës e ka edhe babai ose prindi birësues mashkull , në rast se nëna nuk përmbush kërkesat e ligjit të sigurimeve shoqërore ose dëshiron të mos përfitojë nga kjo e drejtë.

Për një zbatim sa më efikas të këtyre parashikimeve ligjore, për punëdhënësit këshillohet të reflektojnë ndryshimet përkatëse në  rregulloret e brendshme si dhe të bëjnë të mundur që punonjësit të jenë të informuar mbi këto të drejta dhe mbi mënyrën e aplikimit për të përfituar nga këto të drejta.

Për punëmarrësit është e nevojshme të konsiderojnë se në rast se duan të  përfitojnë  nga kjo leje  duhet të respektojnë një afat njoftimi paraprak prej 2 javësh me shkrim .Vlen të përmendet se Punëdhënësi rezervon të drejtën të shtyjë datën e fillimit të lejes prindërore për një periudhë prej 6 (gjashtë )muajsh për arsye të parashikuara në ligj.Në një rast të tillë punëdhënësi duhet të njoftojë me shkrim punëmarrësin brenda dy javëve mbi arsyet e kësaj shtyrjeje.

Shënim sqarues:Sa më sipër është një informacion i përgjithshëm dhe praktik .Informacioni i këtij posti është i përgjithshëm, ai nuk është këshillim ligjor dhe nuk duhet trajtuar si i tillë.Informacioni ligjor i këtushëm duhet marrë ashtu sic është, pa asnjë përfaqësim apo garanci, të shprehur apo të nënkuptuar.Informacioni i këtushëm nuk krijon një mardhënie konsulence juridike apo marrdhënie avokat-klient. Employment Law Albania nuk mban përgjegjësi për pasojat e veprimeve që mund të kryeni apo vendimeve që mund të merrni duke u nisur nga ky postim. Nëse ju nevojitet këshillim ligjor na shkruani ne adresën e emailit:[email protected]